Mos. 13 de febreiro. Os 107 alumnos e alumnas de 3º da ESO do IES de Mos veñen de abrir un espazo de reflexión sobre o impacto das redes sociais na súa saúde mental. A través do obradoiro ‘Saúde mental – Impacto das redes sociais’, guiado pola educadora social Paula Santos, analizaron as emocións que xorden do uso do mundo dixital e puxeron en cuestión crenzas asentadas sobre os algoritmos e os ‘likes’. A actividade terá continuidade o 18 de febreiro.
O taller aposta pola aprendizaxe vivencial, permitindo que o alumnado exprese libremente as súas ideas, mesmo cando parten de mitos ou conceptos erróneos. A posta en común final facilita o debate aberto e a identificación de conflitos emocionais derivados da vida dixital. Entre os obxectivos está fomentar unha relación máis saudable coas redes, derrubar estigmas e ofrecer ferramentas para xestionar o impacto psicolóxico das interaccións en liña.
A iniciativa enmárcase dentro do programa municipal de actividades educativas en horario lectivo, organizado pola Concellería de Educación.
O impacto dixital na saúde mental
En España, un de cada catro adolescentes admite sentir ansiedade ou estrés debido ás redes sociais, segundo diferentes estudos. O uso excesivo destas plataformas está relacionado co insomnio, a baixa autoestima e a dependencia dixital. A nivel global, organismos como a OMS advirten sobre a necesidade de integrar a educación emocional na formación xuvenil para minimizar os efectos negativos do consumo de contido dixital.
