Mos. 2 de xaneiro 2025. O Punto Limpo situado no Parque Empresarial PEMOS Veigadaña contará con importantes melloras que buscan facilitar a xestión de residuos, promover o compostaxe doméstico e fomentar a reutilización. Entre as medidas destacan a instalación dunha biotrituradora que permitirá transformar restos de poda e vexetais en material estruturante de compost, dispoñible de forma gratuíta para a veciñanza. Ademais, poñerase en marcha un mini Punto Limpo móbil que percorrerá as dez parroquias para realizar recollidas a domicilio.
Tamén se optimizará o espazo destinado a pequenos electrodomésticos, co obxectivo de activar no futuro un servizo de reparación e reutilización. Para iso, está previsto formar o persoal en técnicas de preparación de residuos que permitan seleccionar aqueles aptos para unha segunda vida.
Este proxecto, financiado maioritariamente mediante unha subvención da Xunta de Galicia a través dos fondos NextGenerationEU, foi supervisado esta mañá pola concelleira Laura Méndez e persoal técnico municipal. Segundo destacaron, búscase facilitar o acceso a recursos sostibles, reducir a vertedura de residuos e avanzar cara a unha economía máis circular.
Aposta internacional pola reciclaxe
O plan inscríbese nunha corrente global de iniciativas enfocadas na reciclaxe e na economía circular. En Europa, países como Suecia destacan por sistemas que recuperan máis do 99% dos residuos. Estes modelos son fundamentais para reducir a pegada ambiental e minimizar o impacto dos vertedoiros.
En Galicia, proxectos coma este están financiados con axudas europeas dirixidas á mellora de infraestruturas de xestión de residuos municipais, permitindo que municipios pequenos tamén dean pasos significativos cara á sustentabilidade ambiental.
