Medio centenar de veciños acudiron esta semana ao rexistro municipal para presentar reclamacións contra o coñecido como “catastrazo”, un cambio no catastro que afectou máis de 700 leiras e vivendas no municipio. As demandas buscan a devolución de máis de 1,2 millóns de euros cobrados de forma irregular en concepto de IBI.
O Tribunal Superior de Xustiza de Galicia (TSXG) anulou por segunda vez esta medida ao considerala “contraria a dereito”. A sentenza, firme desde outubro de 2023, conclúe que os terreos en núcleos rurais tradicionais non poden ser tratados como urbanos para efectos fiscais, xa que carecen dos servizos propios das zonas urbanizadas. Esta decisión afecta a máis de 5.000 propietarios, que pagaron impostos superiores aos que lles correspondían nos últimos catro anos.
A Plataforma Veciñal contra o Catastrazo, formada por máis de 160 veciños, lidera estas reclamacións e anima a outros afectados a sumarse. Antonio Heredero, avogado de BGI LAW, destacou que “todos os veciños teñen dereito a reclamar o diñeiro cobrado de máis”. Pola súa parte, José María Mantilla, do despacho Calixto Escariz Abogados, sinalou que estas sentenzas abren un camiño claro para que os propietarios recuperen os importes pagados indebidamente.
O Concello enfróntase agora á devolución das cantidades recadadas irregularmente, mentres os veciños continúan presentando demandas para defender os seus dereitos fiscais.
